今夏由曼联自由身重返祖云达斯嘅保罗普巴，於上场热身赛2比0胜瓜达拉哈拉完成首骚，不过佢上周六(23日)一课操练期间弄伤左膝，唔通免费最贵系真嘅？

祖云达斯2016年以天价1亿欧元出售普巴畀曼联，今夏又免费签番未足30岁嘅普巴，真系赚到笑，大批花生客等睇普巴系咪真系帮到祖记，点知踢咗首场热身赛之後就出事，令会方感到担忧。

普巴同球迷见面时表示，暂时冇大碍，但为安全起见，下仗热身赛对巴塞隆拿应该唔会上阵。佢仲同球迷开心自拍，心情冇受影响。

祖记官方其後证实，普巴左膝外侧半月板损伤，将安排专家会诊，记者佩杜拉透露，普巴伤势比想像中严重，很可能要动手术，并休战两个月，至九月下旬复出，将错过意甲开季7轮赛事，当中包括对罗马，如果康复情况理想，应该唔会影响普巴参加年底嘅卡塔尔世界盃。

由於普巴唔出得，主帅阿里基将会继续试阵，消息指杜辛华荷域将会复出，新加盟嘅意甲最佳後衞比美亚Gleison Bremer将会正选披甲，夥拍邦路斯镇守後防。