上季意甲冠军AC米兰宣布重大收购，以3,600万欧元转会费签入布鲁日21岁新星基迪拿尼，呢位身高1米92嘅比利时国脚技术全面，可胜任进攻中场及前锋，被睇好可以做伊巴谦莫域接班人，成为A米锋线新旗帜。

基迪拿尼近年迅速冒起，过去2季都系布鲁日主力，上季更做出「双双」数据，为呢支比甲劲旅上阵49场，射入18球及10次助攻，表现令人惊喜，一向「理财谨慎」嘅AC米兰都不惜豪花3,600万欧元收购佢，基迪拿尼将会着AC米兰90号球衣。

由於伊巴谦莫域因伤长抖，加上另1位前锋基奥特已经35岁，难以每场都踢足，相信基迪拿尼新一季将有大把表演机会。

值得一提，基迪拿尼曾为比利时国家队上阵8场入1球，唯一入球就系上年10月欧国联季军战，後备上阵射入意大利大门，但比利时该仗输1比2。