巴塞隆拿周一(8日)凌晨喺甘柏盃，主场6比0大胜墨西哥球队普马斯，呢场波话题多多，罗拔利云度夫斯基攻入佢加盟後首个入球，普马斯亦有新兵丹尼尔倒戈，不过最令人关注嘅都系荷兰国脚法兰基迪庄，呢位受到曼联同车路士青睐嘅球星，下半场上场有入波兼有一次精彩个人表演，技惊四座。

巴塞今场踢得相当轻松，罗拔利云度夫斯基开波3分钟先开纪录，2分钟後佢助攻柏迪射入，奥士文尼迪比利10分钟改写成3比0，19分钟「罗拔仔」再次助攻柏迪建功，令巴塞半场领先4比0。半场巴塞换走大半队，法兰基迪庄亦粉墨登场，49分钟奥巴美扬亦有进帐。

之後法兰基迪庄有一次精彩Solo，佢喺後场接波後第1时间假身避开对手，突然加速狂推数十码，再有脚背交出直线穿过对手3名守将，可惜队友制造嘅攻势未能转化入波。法兰基迪庄喺86分钟前场逼抢成功，抢波後杀入禁区射入埋斋。