利物浦上场英超仅逼和富咸，痛失2分，一条中场线表现备受批评，好多红军球迷呼吁会方今夏签入中场球员，否则难同曼城抗衡。利物浦《回声报》献计，认为利物浦应该加入争夺法兰基迪庄，取代「玻璃脚」堤亚高艾简达拿。

利物浦中场线的确隐忧重重，队长佐敦轩达臣无复当年之勇，阿历士张伯伦、拿比基达只剩下1年合约，法宾奴、堤亚高艾简达拿经常受伤。

特别系堤亚高艾简达拿效力红军第1季就因伤错过14场英超，第2季又错过13场，今季踢首场英超就受伤，需要抖6周，实在唔可靠。

因此《回声报》认为利物浦应该把握巴塞要出售法兰基迪庄，趁机抢人，将佢打造成球队新中场核心。

呢位25岁荷兰国脚拒绝转投曼联，只因对方冇得踢欧联，利物浦可以满足到佢，更何况红军仲系英超及欧联争标热门球队，对於迪庄有吸引力。

同埋车路士都睇中法兰基迪庄，如果利物浦可以捷足先登签到佢，变相打击车仔，避免1位猛将落入劲敌手上，可以话系一举两得。