新一季意甲将於周日凌晨开锣，由「寸王」摩连奴执教嘅罗马蠢蠢欲动，今夏精准式投放，签入3位「冠军级」球星保罗戴巴拿、尼曼查马迪、韦拿杜姆，整体实力获得提升，配合「摩二季」效应，力争打破「神圣联盟」AC米兰、国际米兰、祖云达斯垄断意甲锦标21年局面，将联赛冠军奖盃带回首都。

摩连奴相隔11年，上季重返意甲搵食，执教罗马，虽然最後仅排联赛第6位，但亦夺得欧协联冠军。「寸王」当然唔会只满足於1只盃仔，今季目标直指意甲冠军，佢增兵策略亦主要签入「冠军级」球员，以佢哋丰富大赛经验，提升球队战斗力。

3位球星新兵之中，前锋保罗戴巴拿效力祖云达斯，曾经5夺意甲冠军，中场韦拿杜姆协助利物浦捧欧联及英超等多项冠军，上季亦为巴黎圣日耳门赢法甲冠军，至於尼曼查马迪更加系摩连奴「契仔」，二人曾合作为车路士夺得英超冠军。甚至连另一位新兵後衞薛基施历，都帮里尔捧过法甲冠军，罗马现时「冠军班底」绝对唔嘢小。

摩连奴教波生涯，往往都系第2季创出最佳成绩，因而有「摩二季」效应之称，所以佢嚟紧执教罗马第2季，自然令人期待。值得一提，对上一次由非「神圣联盟」AC米兰、国际米兰、祖云达斯捧意甲冠军，就系2001年嘅罗马，大家拭目以待，睇吓呢支首都球队能否重演当年好戏。

●AC米兰食老本祸福难料

AC米兰上季重夺失落11年嘅意甲冠军，当球迷期待佢哋大事扩军力争衞冕，但「红黑兵团」就反高潮，增兵动作极度缓慢，连重伤长抖嘅40岁老将伊巴谦莫域都续埋约，基本上系谂住「食老本」争冠。

AC米兰本身主力阵容都算年轻，如果可以作出几个星级收购，绝对有好大爆发潜力。不过AC米兰开咧前只系签入自由身嘅奥历治，以及由布鲁日签入比利时新星基迪拿尼，两人都唔系可以领军嘅「大哥级」球员，唔好忘记佢哋仲有基斯尔同队长阿利斯奥罗马洛尼离队，整体实力未见增强。

辛度东拿利、拉菲尔利亚奥等新星潜质优厚，相信系AC米兰继续依赖嘅目标，40岁嘅伊巴谦莫域亦已续约1年，佢同基奥特继续分担前锋重任，就算唔计伤患问题，两位老将比上季又老1岁，可唔可以兼顾欧联同意甲颇成疑问。

●普巴返祖记有靠害之嫌

近两季失落意甲嘅祖云达斯，今季决心重建王朝，阿里基今夏大事扩军，阵容大翻新，前、中、後场都有新兵加盟，不过季前热身赛效果一般，今季回巢被寄予厚望的保罗普巴更一操即伤，似乎包藏祸心，「老妇人」今季要睇路。

祖记今夏主要收购包括保罗普巴、迪马利亚、基尔臣比尔马，取代离队的保罗戴巴拿、马菲斯迪历特，一轮换血後再上征途，不过季前热身赛表现麻麻，先後不敌皇家马德里及马德里体育会，状态未达标。

转投曼联6年後回巢嘅保罗普巴，本被视为重建核心，可惜这位法国中场甫开操即严重受伤，摆明靠害，祖记免费签佢返嚟以为有着数，点知免费先系最贵。

●国米重签卢卡古未必掂

国米上季衞冕意甲失败，主因系经常浪费入波机会，今夏立即从车仔借用旧将卢卡古。「魔兽」喺2019-2021年效力国米期间，95仗共入64粒，系重夺意甲冠军嘅头号功臣，但经过上季喺车仔失意後，信心受挫，更出现体重超标问题，7月尾体重更超过222磅，需要接受「地中海式饮食法」减肥。

其实卢卡古当年喺国米成功，与严师干地嘅鞭策及识得用佢有关，佢曾经寸车仔主帅杜曹放卢卡古喺禁区当柱趸中锋咁用，完全系嘥料，而国米主帅施蒙尼恩沙基冇「使用说明书」，若果打法唔啱佢又会闹情绪，想令「魔兽」再翻生从而增强前线把握力，绝对唔易。