巴塞隆拿同法兰基迪庄嘅薪酬风波愈搞愈僵，一直企硬唔收到欠薪唔转会嘅法兰基迪庄，周三(10日)去训练期间被球迷羞辱，数名球迷对住呢位荷兰中场大叫：「减薪啦，人渣！」影片曝光後引起唔少争议，网民都认为巴塞隆拿球迷行为太过份。

西班牙《每日体育报》影到，法兰基迪庄揸车驶入训练场期间，数名等候嘅球迷大叫「减薪啦，人渣！」法兰基迪庄当然冇理会直接入去训练场，但片段就引起争议，网民表示法兰基迪庄只系扞卫自己应有嘅权益，巴塞搞唔掂盘数唔应该迁怒球员。

巴塞隆拿一直未能为几为新加盟球员注册，卖唔走法兰基迪庄系主要原因之一，虽然巴塞之前已经接纳曼联同车路士开价，但法兰基迪庄就坚持要收番巴塞承诺畀佢嘅2,000万欧元人工先肯走，日前有消息指巴塞更打算采取法律行动，指法兰基迪庄同前任会长所签嘅合约系违法。