继C朗之後，又有1位曼联前锋准备离队，英国及法国传媒爆料，指法甲冠军巴黎圣日耳门(PSG)已经派人同拉舒福特嘅经理人接触，力邀呢位24岁英格兰国脚加盟。

由於拉舒福特现时合约剩下唔够1年，加上PSG出手挖角，如果红魔鬼想留住呢位青训产品，可能需要开出超高薪合约，先至吸引到「福仔」续约。

早於今年3月已经传出PSG有兴趣签入拉舒福特，加迪亚今夏成为新帅後，希望签入1位活动范围广泛嘅前锋，拉舒福特再次成为PSG收购目标。英国《每日邮报》指PSG嘅代表近日同拉舒福特嘅经理人喺巴黎见面，商讨呢位前锋入「门」嘅可能性。

不过，曼联领队坦哈格视拉舒福特为球队骨干人物，相信唔会放人，英国传媒指「福仔」踏入续约关键时期，佢嘅经理人可能故意放料，向曼联施压，争取最有利续约条件。根据双方现时合约，曼联有权自动同拉舒福特续约1年，所以短期内未必出手挽留佢。

事实上，拉舒福特近年表现欠佳，上季上阵32场仅入5球，今季首场英超对白礼顿，更频频浪费入球机会，唔少球迷认为既然PSG肯接货，曼联应该趁机出售拉舒福特，重建锋线。