周六晚(13日)英超激战，曼城主场迎战升班球队般尼茅夫，今场奇云迪布尼同菲尔科顿做主角，两位攻击手各交出1传1射，包括迪布尼一记右脚脚面死角靓波，协助「蓝月亮」4比0大胜对手，两战两胜升上榜首。

曼城今仗阵容微调，由马列斯取代基亚利殊踢正选，其余位置不变，般尼茅夫亦以赖恩基士堤取代苏兰基，单箭头继续系基化摩亚。艾宁夏兰特上仗帮曼城入两粒，今场个个惊咗佢，但佢今场主要做牵制角色，19分钟交出助攻，由根度简入楔埋门先开纪录。

31分钟菲尔科顿送交奇云迪布尼，去到射程范围假身一摆再扮传波，其实系右脚脚面射死角网仔收死对方门将卓华斯，曼城赢到2比0，转头迪布尼报恩，靓交菲尔科顿埋门射成3比0完半场。

下半场曼城陆续换出主力，夏兰特亦於74分钟鸣金收兵，但踢到79分钟曼城又入波，祖奥简斯路左路底线传中，谢法臣拿马摆老乌，曼城赢到4比0完场。