周六（27日）晚英超头场，曼联王牌C朗同哈利马古尼继续冇正选，凭住队长般奴费南迪斯一箭定江山，作客险胜「圣人」修咸顿1比0，联赛2连胜兼保持不失，魔性澎湃。

曼联挟上仗击败利物浦之势，主帅坦哈格沿用番嗰场赢波阵容，王牌C朗、哈利马古尼继续冇正选，同新加盟嘅卡斯米路齐齐坐冷板，开波初段互有攻守，不过红魔之後慢慢控制战局，令修咸顿防线风声鹤唳，讲到最入肉攻势，系艾兰加於右路窄位抽射，畀主队门将巴斯奴救出不远，般奴费南迪斯执鸡唔入，个波漏咗畀基斯甸艾历臣再趟射又省到对方後衞弹出，3连射都唔入真唔抵，半场互交白卷。

易边後曼联未有放松，去到55分钟，达洛治右路横传，般费第一时间窝利破网，终於打破僵局，亦系呢位队长今季开斋波。修咸顿失波後积极反扑，阿当岩士唐喺左路出个靓波，迪赞尼普近门一顶，迪基亚反应超快扑出，获加彼德斯再补顶却高出。曼联之後换入C朗，冇耐卡斯米路亦入场，首度为新东家披甲，最终小胜1粒，联赛连赢两场，但C朗落场都冇乜表现，如果唔走睇嚟都只能做後备杀手。