车路士今个夏天放走卢卡古同迪姆华拿2大前锋後，仍然未搵到替补人选加盟，喺转会市场即将关闭下紧急追「锋」。英国传媒报道，水晶宫前锋韦费特沙夏已成为猎物之一，甚至有机会「翻兜」斟介C朗拿度！

车路士嘅头号目标系巴塞隆拿前锋奥巴美扬，不过斟介就遇上阻滞，由於车路士只想向呢位33岁前锋开出1年合约，而奥巴美扬就希望签2年，交易面临告吹。据英国《卫报》消息，同水晶宫只剩1年合约嘅韦费特沙夏，预计可以平价转会，车路士正考虑出手。

英国《独立报》就报道，C朗经理人佐治文迪斯得悉车路士签奥巴美扬有问题，已再次同车仔班主保利联络，睇下转会有冇机会「死灰复燃」，但消息指车路士领队杜曹仍然有保留，只系唔知如果最後心仪目标买唔到，会唔会退而求其次。