韦斯咸周六(3日)英超作客1比2输畀车路士，佢哋补时阶段本来有哥尼特入波追平，但VAR检查後指车路士门将艾度亚文迪被侵犯在先，球证改判入球无效。韦斯咸领队莫耶斯赛後大发雷霆，怒轰艾度亚文迪「插水」，据报更怒闯球证更衣室找晦气，表示「对球证冇晒信心」。

哥尼特入波前，查洛保云喺艾度亚文迪扑救後有轻微接触，导致球证改判诈胡，莫耶斯愤怒表示：「呢个判决系丑闻！我一直都好支持VAR，但今次系一个难以置信嘅错误决定，我唔知VAR系边个控制，最可悲系呢班人本应系顶尖球证，我依家对英超球证执法已经冇晒信心。」

莫耶斯亦炮轰艾度亚文迪「插水」：「车路士个龙门救波失误之後就扮膊头受伤，喺第1个入波嗰更佢已经咁做，而球证竟然畀佢呃到。」英国《talkSPORT》消息指，莫耶斯赛後嬲到走入球证更衣室内质问，或会被英足总处分。