周日(4日)凌晨英超赛事，衞冕嘅曼城作客被阿士东维拉逼和1比1，不过挪威神锋艾宁夏兰特继续施展入球功架，射入登陆英超6场联赛第10个入波，打破英超史上最早拎到双位数入球纪录(第6轮)，目前喺射手榜一枝独秀，大有机会染指金靴奖。

连续2场连中三元嘅艾宁夏兰特，上半场表现唔算活跃，主队维拉嘅反击更有威胁，不过50分钟曼城又系靠艾宁夏兰特先拔头筹，佢接应奇云迪布尼右路传中，展现强劲弹跳力近门将个波射入。呢位挪威前锋之後再有射门被救出，反而维拉喺74分钟唯一一次中龙埋门，就由里安拜尼狂抽射入，最终踢成1比1平手。

曼城上季虽然系冠军，但只有3个球员入球达双位数，首席射手奇云迪布尼只系得15球，艾宁夏兰特今季只系6场就入10球，打破英超史上最早拎到双位数入波纪录，亦追平米克昆尼喺92年11月创下，转会後头6场联赛入10球纪录。

曼城领队哥迪奥拿赛後表示：「我哋踢得唔错，但维拉第1次中龙就入波，球员喺前场做得唔够细致，呢个系控制战局下入唔到第2球嘅原因。」至於艾宁夏兰特赛後喺社交网表示，依家要切换「欧联模式」，曼城会喺周三(7日)凌晨作客西维尔，艾宁夏兰特喺对上11场欧联入咗13球。