葡萄牙巨星C朗因为渴望踢欧联，今夏一直想离开曼联，但新队友安东尼马菲奥斯反而放弃为阿积士出战今届欧联，选择加盟红魔鬼，可以话系两个极端，原来背後都系钱作怪，因为曼联向呢位22岁巴西翼锋开出嘅薪酬条件实在太吸引。

根据外传报道，阿积士上季最高人工球员系今夏已转投多蒙特嘅施巴斯坦贺拿，除税後年薪为204万欧元，至於安东尼马菲奥斯仅有78万欧元年薪，同两人表现唔对秤。

曼联似乎亦睇中呢点，以「银弹战术」利诱安东尼马菲奥斯，佢成「魔」後获得665万欧元年薪，人工急增超过8倍，令安东尼无法拒绝，所以佢宁愿放弃踢今届欧联，甚至不惜罢操都要逼阿积士放佢去曼联。

身价近1亿欧元嘅安东尼马菲奥斯突然成为「暴发户」，佢嘅哥哥Emerson Santos担心细佬会被「万恶金钱」冲昏头脑，喺社交网凭歌寄意，希望佢记住自己贫民窟出身，就算有钱都要帮助有需要嘅人，唔好被灯红酒绿生活迷惑，影响球场上表现。