阿仙奴周日(18日)作客3比0大胜宾福特，只有15岁181日大嘅华尼利後备登场，成为英超史上最年轻上阵球员，不过「兵工厂」依家面对一个难题，由於华尼利仲未够秤签约，令其他球会有机可乘，曼联、曼城、利物浦同车路士都虎视眈眈。

英国《每日邮报》报道，华尼利喺14岁已经「跳级」踢阿仙奴U18，受到领队阿迪达好高评价，但佢要到明年3月16岁生日，先可以签署学徒球员合约，再等多1年够17岁先可以签职业球员合约，依家呢段时间就系其他球会挖角好机会，报道指曼联同利物浦最有兴趣，而曼城同车路士都密切注意事态发展。

踢进攻中场嘅华尼利，喺英超历史性登场後，依家已经跟英格兰U17飞去波兰比赛，预计之後会主力踢返阿仙奴U18同U21，或者喺欧霸盃分组赛亦有机会再度上阵。