英格兰「万人迷」碧咸近日於伦敦现身，除咗送别英女王，原来仲有另一任务，就系接拍一个卡塔尔世盃广告，收取数百万英镑报酬，但亦惹来人权分子非议。

先讲个广告，系为卡塔尔世盃零食赞助商Doritos做宣传，内容以搞笑为主，广告主角除咗碧咸，仲有美式足球巨星曼宁，主要系透过佢两个去区分英式足球同美式足球嘅差异。

一名消息人士表示：「今次系两位在各自领域拥有非凡成就及极具影响力嘅运动员合作，有极高报酬，不过任何同卡塔尔有关嘅事情都会引起争议。」

碧咸系卡塔尔世盃代言人，合约价值超过1亿镑，佢亦一直受到非议，因为卡塔尔长期存在人权问题，法律对妇女有高度限制，同性恋亦属非法，不过碧咸行走江湖多年自然识点拆，佢透过发言人表示：「过去十多年定期到访卡塔尔，亦深信足球力量可以推动当地各方不断进步。」

此外，英格兰队长哈利卡尼日前宣布，卡塔尔世盃期间将佩戴彩虹主题袖标，以表示对平等权利嘅支持。