葡萄牙近年人才辈出，37岁老将C朗拿度今季又喺曼联长坐冷板，令人担心佢嘅国家队地位受到动摇，不过葡萄牙领队费兰度山度士日前大派定心丸，表明C朗就算喺球会上阵时间减少，都唔会影响佢喺葡萄牙嘅位置。

C朗今季英超只踢过207分钟比赛，而且冇入过波，欧霸盃2仗担正并只系靠12码入1球，状态明显不足，但费兰度山度士就话：「我从来冇担心过C朗喺曼联嘅上阵时间问题，同其他球员一样，我会去了解C朗依家嘅环境，但我相信冇人会质疑C朗继续为葡萄牙贡献嘅能力。」

葡萄牙9号位嘅人选，仲有祖奥菲历斯同安达施华，但佢哋表现都唔足以证明自己比C朗优胜，费兰度山度士更表明佢已开始为世盃点兵，而且有幸福的烦恼：「我依家准备紧一份55人初步名单，要喺咁多好球员入面选择已经好头痛，何况最後只有26个？当然有55人拣点都好过得20人拣，呢个烦恼属於幸福嘅烦恼。」