英格兰喺欧国联提前降班，领队修夫基立即成为众矢之的，大批球迷要求英格兰足总「做嘢」，应立即聘请被车路士炒鱿嘅杜曹带队踢世界盃。不过，修夫基就表明无意辞职，坚称自己仍然系带领英格兰出战世盃「最合适人选」。

修夫基嘅战术同排阵备受争议，坚持起用状态差劲嘅哈利马古尼、将布卡约沙卡放喺左翼衞等决定都受到质疑，唔少球迷认为「盃赛专家」杜曹系带队出战世界盃最佳选择，佢试过季中接手车路士即捧欧联，依家又系自由身，兼且仲留喺英格兰生活，英格兰足总唔应该错失良机。

不过，修夫基就表明会坚持带队去卡塔尔：「我接受大家嘅批评，但我仍然系带领英格兰踢世界盃最合适人选，我留低一定系对球队最稳定嘅做法。我嘅工作成绩，最终都系会由世界盃嘅成绩去做决定。」