周日(25日)凌晨欧国联A2组大战，葡萄牙喺「曼联帮」带领下作客4比0大炒捷克，反压同日输波嘅西班牙登上榜首，最後1轮对西班牙唔输就出线，形势大好！葡萄牙嘅「曼联帮」今场威尽，但C朗拿度就斯人独憔悴，冇入波之余仲曾经输12码，又被撞爆缸搞到血流披面，好在佢最後都冇乜大碍，下场对西班牙应可候命。

葡萄牙今场有C朗担正箭头位置，表现非常落力，但12分钟就冲顶同捷克门将相撞，结果被打爆鼻流到成面都系血，军医治理一大轮後终於继续比赛。葡萄牙今场不断进攻，33分钟拉菲尔利亚奥左路底线传中，右闸达洛治入楔走靓位轻松射入，完半场前般奴费南迪斯抢点射成2比0。

上半场补时阶段，C朗禁区内犯手球输12码，好在捷克射手柏德列舒希克操刀中楣弹出。葡萄牙下半场继续施压，52分钟达洛治离门近30码放冷箭直入死角，个人梅开二度；去到完场前8分钟，C朗头槌攻门顶斜，迪亚高祖达门前补一头顶成4比0，C朗无心插柳下都有1个助攻，令「曼联帮」直接间接包办晒4个入波。

葡萄牙领队费兰度山度士赛後继续力撑C朗：「C朗冇波入？足球就系咁样，佢有3、4次机会都被对手挡住，但佢为球队作出好大贡献，永远出现喺正确嘅位置上，如果冇佢喺度，其他嘅入波亦唔会出现。C朗比赛後好开心，因为葡萄牙赢波。」