周二(11日)凌晨英超独脚戏，阿士东维拉作客包尾嘅诺定咸森林，只能1比1逼和对手，9战只得9分继续喺护级漩涡挣扎，巴西球星菲腊比古天奴表现继续令人失望，完场後大批维拉球迷向佢哋柴台，谢拉特亦点名批评古天奴嘅表现。

呢场下游大战水平差劲，两队加埋只有5次中龙埋门，维拉虽然有菲腊比古天奴、贝安迪亚、奥尼屈坚斯等进攻好手，但表现乏善可陈，森林15分钟由艾曼纽丹尼斯先开纪录，维拉就靠37岁老将艾舒利杨格远射追平，最终两队1比1握手言和。

维拉完场後被球迷狂嘘，只踢65分钟就被换走嘅菲腊比古天奴再成众矢之的，领队谢拉特赛後表示：「我明白呢啲嘘声，我唔系傻嘅，维拉需要入波同分数，攻击球员需要更加勇敢，维拉买咗好多星级攻击球员，对佢哋有要求系好正常。古天奴知道自己应该踢得更好，一条攻击线要付出更多。」