周一(17日)凌晨德甲赛事，拜仁慕尼黑主场5比0大炒弗赖堡，踢出今季其中一场最流畅嘅进攻足球，而今季首次担正嘅祖普莫亭交出1传1射，再次证明一个正宗中锋对拜仁嘅作用有几大，而祖普莫亭目前可能系阵中唯一「答案」。

自罗拔利云度夫斯基离队後，祖普莫亭就成为阵中唯一正宗「9号仔」，今场佢担正发挥极大作用，基拿比13分钟先开纪录入波，就系祖普莫亭喺禁区内做「支点」开始，呢位喀麦隆前锋33分钟窄位抽入，拜仁半场领先2比0。下半场拜仁继续进攻，52分钟祖普莫亭後脚妙传，利莱辛尼推横射入世界波，沙迪奥文尼同沙比萨之後各入1球，助拜仁大胜5比0完场。

祖普莫亭今场1传1射外，3次过人全部成功，传球成功率高达89%，拜仁教练拿高斯文赛後亦点名大赞呢位前锋：「佢踢得非常之好，将平时操练嘅表现带入比赛，其实佢一早已经值得担任正选，我知道佢系值得依赖嘅球员，好开心有佢帮手。」