德国《天空体育》报道，热刺射手哈利卡尼愿意加盟拜仁慕尼黑，不过热刺仍然系佢首选，转会关键系明年夏天，因为哈利卡尼同热刺尚余两年合约，如果仍未续约，热刺好大机会明年夏天将佢出售。

罗拔利云度夫斯基今夏离队，拜仁原本有意挖角哈利卡尼代替，但未能成事，唯有再等机会；之前德媒报道，拜仁愿意为哈利卡尼支付1亿欧元转会费，如果明年夏天斟介，喺哈利卡尼尚余1年合约情况下，希望以一个相对合理价钱签入该射手。

报道指，哈利卡尼仍未决定同热刺续约，如果转投拜仁，对佢足球生涯系重大转机，至少可以稳夺德甲，欧联亦系争标份子，而且可以转换新环境，对佢嚟讲好有吸引力。

哈利卡尼今季状态重回高峰，据英超官方统计，哈利卡尼近5仗联赛连续士哥，创下个人英超连续入球纪录；佢今季各项赛事上阵14场攻入10球2助攻，不过表现几好都冇用，热刺近年捧唔到盃，系佢无法抵抗拜仁诱惑嘅原因。