啱啱喺意甲输畀拖连奴，欧联出线资格亦未稳阵，AC米兰喺周四(3日)凌晨对萨尔斯堡嘅生死战前，官宣同教练皮奥利续约至2025年，为球队注下强心针。

57岁嘅皮奥利同AC米兰原本合约明年夏天到期，呢位教头早就表明希望续约，今次签约後人工只系轻微增加，年薪由300万欧元加到350万欧元，不过皮奥利就非常满意：「续约一直系我嘅愿意，好多谢AC米兰畀机会我，呢份合约令我更有力量去继续依家嘅工作。」

皮奥利喺2018年10月执教AC米兰，佢为球队作出变革，近2年进入收成期，20/21球季拎到意甲亚军，上季更加时隔11年後再拎意甲冠军。AC米兰目前喺意甲排第3位，落後榜首拿玻里6分。