拿玻里今季喺意甲同欧联都排第1位，表现令人刮目相看，南韩中坚金玟哉嘅出色表现更受到各大豪门关注，据报曼联、热刺等英超豪门都对佢虎视眈眈。虽然拿玻里绝对唔会轻易放走呢位中坚，不过据拿玻里律师爆料，明年夏天将有一次金玟哉「限时特卖」，畀欧洲各大豪门有机可乘。

拿玻里今夏卖高列巴尼去车路士後，用1,800万欧元向费伦巴治收购金玟哉，呢位25岁南韩中坚表现极佳，成为球队防线核心之余，亦系意甲9月最佳球员，有传佢份合约内有5,000万欧元买断条款，对一名顶级中坚嚟讲绝对唔贵。

拿玻里律师加辛尼日前证实，买断条款确实存在，但只会喺有限时间内生效：「今个夏天，金玟哉嘅买断条款会有15日生效时间，拿玻里嘅动机好简单，就系万一真系有球会启动收购条款，我哋都有充足时间去物色替补。」消息指金玟哉嘅「限时特卖」会喺7月1日展开，到15号就完结。