周日(30日)西甲赛事，皇家马德里主场被基罗纳逼和1比1，今场皇马喺球证判决上面冇乜运，尾段输12码兼有却奥斯拎到职业生涯首张红牌，教练安察洛堤赛後嬲爆话畀球证「砌生猪肉」，言论面临西班牙足总处分。

皇马今场发挥一般，同基罗纳踢成均势，去到70分钟凭云尼斯奥斯祖利亚入波打破僵局，但去到尾段就由球证做主角，80分钟马高阿辛斯奥被指禁区犯手球，不过慢镜显示个波省中心口至手臂附近位置，手球并唔明显，基罗纳由史杜安尼操刀追平。补时阶段皇马中场却奥斯喺中场犯规，2黄1红被逐离场，亦系呢位德国国脚职业生涯740场赛事首次领红。

皇马失分後，喺西甲仍以1分领先巴塞隆拿排榜首，但安察洛堤赛後嬲爆表示：「我唔锺意讨论球证判决，但今次都系要讲，因为呢个根本唔系12码，个波省中阿辛斯奥胸口，12码完全系球证创作出嚟。」据《世界体育报》报道，安察洛堤同马高阿辛斯奥赛後喺社交网嘅批评球证言论，都被西班牙足总调查，或会受到处分。