英超踢埋今个星期就会暂停1个半月，让路世界盃决赛周，曼联领队坦哈格周三(9日)喺一个球迷会议入面，公布休战期间安排，「红魔鬼」将会飞去西班牙进行1个星期集训，期间预计会安排2场热身赛，帮助冇份踢世盃嘅球员保持状态。

坦哈格同12个官方球迷会嘅会员见面，呢位荷兰教头表示：「我哋有好多球员要踢世界盃，我哋都觉得好开心，因为咁代表曼联有好多精英球员。其他冇份踢世界盃嘅球员，呢6个星期一样要训练嚟保持状态，球会已尽量制定合适计划。留喺度嘅球员会先训练1个星期至9日，之後会有个小假期，之後会去西班牙进行1个星期集训，喺西班牙亦会安排热身赛，备战下半季赛事。」

英国《曼彻斯特晚报》报道，曼联会喺12月7日同卡迪斯踢热身赛，之後会再踢多一场，但系对手仍然有待安排。