修夫基早前公布英格兰大军名单，状态甚弗嘅宾福特前锋艾云东尼落选，外界一度质疑，但依家唔使拗喇，英格兰足总周三(16日)发声明，指东尼因多次涉及违规赌波接受调查，有机会被罚停赛，修夫基唔带佢去卡塔尔亦避免招惹麻烦，有理由相信佢一早收到风。

世盃名单公布後，东尼立即喺英超梅开二度，协助宾福特击败曼城，向修夫基作出有力回击，不过依家真相大白，佢几好波都冇用，因为佢手脚唔乾净，英足总表示，已就佢违规赌波调查咗半年，报告长达2800页，案情相当严重。

案情指，东尼喺2017年2月25日至2021年1月23日期间，违规赌博232次，条例规定禁止球员下注相关比赛，以及向外提供幕後信息，该段时间东尼分别效力斯肯索普、韦根、彼德堡同宾福特。东尼亦有抗辩机会，佢可以喺本月24日之前回覆英足总。

至於罚几重，就要视乎东尼参与赌波去到咩程度，如果佢买自己球队输波，有机会被判终身停赛，如果买赢，最高亦要停赛半年。