哈利卡尼喺世界盃8强比赛末段射失12码，导致英格兰错失扳平机会，1比2不敌法国，被淘汰出局。不过，英国主流舆论并冇怪责呢位射手，名宿朗尼、名嘴皮尔斯摩根都力撑哈利卡尼，认为佢仍然系英格兰最佳前锋，希望佢振作。

哈利卡尼今仗入1球，以53球追平朗尼嘅纪录，并列英格兰国家队史上射手王，赛後朗尼不忘安慰卡尼：「恭喜哈利卡尼追平我嘅纪录，佢好快会创造属於自己嘅纪录，佢系我嘅最佳接班人，要振作呀！」

至於早前为C朗做专访「爆曼联大镬」嘅英国名嘴皮尔斯摩根亦支持哈利卡尼：「你唔会遇到比哈利卡尼更全面、更正直嘅球员，佢系英格兰优秀领导者，为佢感到心碎。」

完场後哈利卡尼一度踎喺球场，久久未能释怀，领队修夫基同队友都过去安慰佢，门将比克福特更出手遮住摄影机镜头，唔想电视台影到哈利卡尼痛苦表情。

另外，一向言论苛刻嘅英格兰名宿连尼加都满意英格兰今场表现：「再一次心碎，但输畀衞冕球队并唔羞耻，呢支英格兰年轻又出色，已经尽咗力，将会变得更好。」可见英格兰今届世界盃已经交足功课。