德国队及拜仁慕尼黑门将纽亚度假期间滑雪断脚，提早收咧，拜仁急住搵龙门，世盃赛场就有个现成喺度，佢就系摩洛哥神龙耶辛尼保奴，据报道呢位门将演出深得拜仁高层简尼赞赏，打算签佢担任拜仁正选门将。

31岁嘅耶辛尼保奴系摩洛哥杀入世盃4强嘅大功臣，包括16强互射12码淘汰西班牙，8强对葡萄牙作出3次关键扑救，证明佢顶得住压力，可以喺欧洲豪门立足，拜仁本身已拥有摩洛哥国脚後衞马沙拉奥，简尼认为耶辛尼保奴能当重任，系下半季德甲同欧联嘅门将最佳人选。

《每日邮报》报道，除咗拜仁，英超阿士东维拉同狼队都想签佢协助护级，但两支英超队嘅吸引力远远不及拜仁，报道指，耶辛尼保奴与西维尔合约至2025年，不过佢身价唔高，德国《转会市场》显示其身价为1500万欧元，而两年前佢由基罗纳转投西维尔，当时转会费仅400万欧元，以拜仁财力，收购呢位神龙相当简单。