作为美斯「守护天使」嘅迪马利亚，决定改变退出国家队嘅念头，希望继续留喺阿根廷以作为世界盃冠军嘅身份享受比赛。

34岁嘅迪马利亚依家系阿根廷主力，世界盃决赛攻入关键性一球，而佢曾於今年5月表示，会喺世界盃後退出阿根廷国家队，但夺得冠军後，佢又改变主意。外媒报道指迪马利亚将会继续为国家效力，等明年3月再睇情况决定去留，目前想要作为世界冠军继续为国家踢波。值得一提，美斯之前已表态继续为阿根廷效力。

其实迪马利亚绝对系美斯嘅「天使」，佢哋系同期战友，而且过去几个大赛决赛只要有迪马利亚在场，美斯就可以捧盃，当中包括2008北京奥运、2021年美洲国家盃同埋啱啱嘅世界盃；至今为阿根廷国家队出战129场攻入28球助攻27次。

迪马利亚仍然乐醉於世界盃冠军，佢早前更在自己嘅右大腿上，纹上了巨型世界盃图案，可以将奖盃永远留住，而迪马利亚跟住会飞返意大利，备战明年1月4日祖记嘅意甲赛事，而佢同祖云达斯嘅合约至明年6月届满，佢曾表示有意之後回到阿根廷踢波，但又有可能同祖记续约。