37岁嘅墨西哥「Sam哥」奥祖亚喺卡塔尔世界盃表现仍然抢镜，虽然墨西哥未能喺小组出线，但球迷对佢印象仍然深刻，而世盃已过，但呢位墨西哥门神仍未言退，仲决定加盟意甲沙兰力坦拿，已经啱啱签约，果然劲呀！

奥祖亚代表墨西哥国家队踢咗135次，参加过五届世界盃，绝对系墨西哥球坛嘅偶像。据报道指「Sam哥」同墨西哥美洲嘅合约将会喺本月31日约满，而礼拜一同沙兰力坦拿开始倾合作，礼拜二就扑搥倾埋合约，只系36小时就倾好；而奥祖亚周四(22日)会去意大利接受体检，明年1月2日意甲转会期开始之後，佢就正式加盟，合约到明年6月30日。

墨西哥美洲官网亦多谢奥祖亚，「你系传奇，呢度永远都系你屋企，感谢你成为我哋球会历史嘅一部份，我哋永远都会记住你，并期待将来再见，你会继续飞翔，带住我哋嘅颜色及旗帜。」