周五(6日)晚上演嘅沙特阿拉伯联赛，艾纳斯凭塔利斯卡梅开二度，主场以2比0击败阿尔泰，主角系身处包厢睇波嘅艾纳斯新兵C朗，据悉呢位葡萄牙巨星仍然未注册，唔可以上阵，但佢即使做「观众」，都令原本冇乜人关注嘅沙特联赛，成为全球瞩目赛事。

比赛期间，C朗曾经一边踩健身单车，一边睇直播，之後亦有亮相球场，进入包厢睇波。虽然C朗冇得上阵，但心情唔错，不时向球迷同传媒挥手，艾纳斯前锋塔利斯卡表现出色，上下半场各入1球，相信C朗应该满意呢位新拍档嘅水准。

外媒指艾纳斯已经用尽8个外援名额，必须放弃1位外援，先至可以帮C朗注册为正式球员。另外，呢位37岁射手上季因打烂爱华顿小球迷手机，被英足总判罚停赛两场，根据国际足协规定，佢即使去沙特搵食，都需要执行处罚。不过，艾纳斯方面却指C朗唔需要停赛，至於佢几时可以为球队出战联赛，仍然未有定案。