继签入C朗之後，沙特阿拉伯豪门艾纳斯亦有意签入皇马中场却奥斯，但呢位刚於1月4日度过33岁生日嘅德国名将拒绝利诱，并愿意同「舰河舰队」续约1年，因为希望「有体面」结束球员生涯。

却奥斯将於今夏约满，但仍未同皇马达成续约协议，传出唔少中东富豪球会有兴趣签入佢，包括星光炄熠熠嘅艾纳斯。不过，却奥斯表明，冇考虑过去中东掘金，甚至如果未能效力欧洲传统大球会，佢宁愿今夏就挂靴。

皇马基於惯例，只会同老将续约1年，并已向却奥斯开出1年新约，佢正在积极考虑当中，如无意外将会接受续约。皇马教练安察洛堤亦话，有信心却奥斯会留队：「实在唔敢想像却奥斯咁优秀嘅球员今夏退休，我相信佢会留喺皇马延续球员生涯，亦系佢自己嘅愿望。」

却奥斯2014年由拜仁慕尼黑转投皇马以来，协助球队夺得3次西甲、4次欧联及4次世冠盃等多项冠军，今季仍然系主将，各项赛事上阵19场入1球。