周六(14日)英超曼市打吡余波未了，曼联凭一个争议性入波2比1反胜曼城，完场後引起球坛热烈讨论。据报曼城将帅完场後喺球员通道包围球证质问，曼联球员亦有份加入，双方一度激烈争执，曼城中坚文路尔艾简治直斥判决系「笑话」，领队哥迪奥拿更直斥球证判决系「因为呢度系奥脱福」。

争议入球出现喺78分钟，曼联中场卡斯米路交出直线，处於越位位置嘅拉舒福特冲前接应，但佢见到般奴费南迪斯同时後上，「福仔」就突然收步让畀後者射入。旁证当时举旗示意越位在先，但球证艾治维认为拉舒福特未有掂波，所以判决入球有效，曼联凭呢个入波追平并最终反败为胜。

着名挪威记者科托夫爆料，赛後球员通道出现混乱场面，基亚利殊、文路尔艾简治、基尔获加同哥迪奥拿一度包围球证理论，其中基亚利殊表现「非常失望」但未有攻击性，曼联嘅哈利马古尼亦加入战团，场面一度非常混乱，幸好消息指未有严重事故发生。

喺争议入波中追缠拉舒福特嘅文路尔艾简治表示：「我好迟先返球员通道，当时事件已差唔多完结，我唔知系边个引起(混乱)，但当时除咗曼联球员，个个都觉得好失望，最後亦冇大问题发生。」对於争议入波，呢位瑞士中坚话：「呢球系一个笑话，拉舒福特一直追住个波到最後一刻，我知佢冇掂波，但佢追个波追咗30米，球证竟然选择睇唔到。」

曼城领队哥迪奥拿同样愤怒，暗指艾治维系偏帮主场嘅曼联：「旁证话拉舒福特有影响，但呢个球场(奥脱福)嘅人(VAR、球证)话冇，咁我可以点？球例就系球例，负责演绎嘅系球证，呢个球场嘅人话拉舒福特冇参与进攻，呢度系奥脱福球场、就好似晏菲路一样，我哋需要踢得更好。」