周一(16日)凌晨将上演「北伦敦打吡」热刺主场对阿仙奴，热刺前锋哈利卡尼有望喺呢场大战「登基」成为球队历史射手王，佢今仗只要入1球，就可以追平已故名宿格里夫斯嘅热刺最多入波纪录，若然起孖，更可一举超越呢位传奇射手。

29岁嘅哈利卡尼上仗英足盃射入全场唯一入球，协助热刺以1比0击败朴茨茅夫之後，已经为呢支北伦敦劲旅累积入265球，仅少过格里夫斯1球，佢要成为热刺史上首席射手指日可待。

如果哈利卡尼能够攻破阿仙奴大门「登基」，就更有意义，一来今仗属於举世瞩目嘅「北伦敦打吡」，二来卡尼8岁时候曾经加入阿仙奴青年军，但却被弃用，辗转加入热刺青训系统，走上球星之路。哈利卡尼喺兵工厂面前，荣升热刺射手王，正好可以剃对方眼眉。

事实上，呢位英格兰国脚职业生涯曾经14次攻入阿仙奴大门，包括上季英超主场梅开二度，协助热刺大胜阿仙奴3比0，今仗随时历史重演。