热刺喺北伦敦打吡主场吞阿仙奴2蛋，两大宿敌对决有唔少埋牙镜头，以火爆见称嘅巴西国脚李察利臣，自世盃受伤後首度候命，由场边热身开始已周围辣火头，影片见佢喺场边先打富安健洋只手，完场後又笃住兰斯达尔个头，唔少球迷质疑佢系咪有躁狂症？

下半场比赛中後段，领先2球嘅阿仙奴获界外球，汤马士柏迪准备掟「手榴弹」，喺场边热身嘅李察利臣就举起双手投诉，之後行前企图骚扰汤马士柏迪，同样做紧热身嘅富安健洋就伸手阻止，李察利臣见到即大力打落富安健洋只手，好在富安健洋表现冷静，未有任何反应。

完场後兰斯达尔向天挥拳庆祝，李察利臣不满对方庆祝过激，走向笃住兰斯达尔个头挑衅，要球场保安将佢推开，随後就发生球迷袭击兰斯达尔事件。见到李察利臣连串躁狂行为，唔少网民留言批评：「李察利臣系职业球员嘅耻辱」、「系咪有躁狂症」、「佢应该要食红牌」、「大家明白点解佢系英超最乞人憎球员」.....