阿仙奴依家喺英超高踞榜首，不过球队後备兵源不足，成为争标一大隐忧，原本1月头号猎物梅迪克又被车路士截足先登。阿仙奴击败热刺後，领队阿迪达表示仍会继续物色新球员，传闻白礼顿嘅日本国脚三笘薫都系目标之一。

据足球网站《90min》报道，阿仙奴以收购攻击球员为目标，签梅迪克告吹後，已接触巴塞隆拿询问拉芬拿比洛尼同费伦托利斯嘅情况，而白礼顿嘅三笘薫同李安度杜沙特都系目标。25岁嘅三笘薫今季成功上位，各项赛事有4入波同2助攻，值得一提系佢入波当中，包括英联盃同英超对阿仙奴2场都有入球，难怪会获阿迪达赏识。

不过，阿仙奴想收购三笘薫有一定难度，事关白礼顿同比利时前锋李安度杜沙特近日「反面」，好大机会喺今个月将佢卖走，如果阿仙奴想撬走三笘薫，相信要付出一笔唔细嘅转会费。