德甲传媒《SPORT1》爆料，指曼联计划收购1位进攻中场，目标直指德甲球队禾夫斯堡嘅22岁新星菲历斯尼美查，呢位德国国脚出身於曼城青年军，其後去德甲搵食，事业发展道路似足红魔鬼翼锋查顿辛祖，难怪网民寸曼联仲未汲取教训，随时又买「水货」。

菲历斯尼美查同哥哥卢卡斯尼美查都曾於曼城青年军受训，跟住转投禾夫斯堡，两兄弟亦一样曾代表过英格兰及德国小国脚，最後选择做德国大国脚。

相比司职前锋嘅24岁哥哥卢卡斯尼美查，22岁「细佬」菲历斯尼美查技术比较全面，可以胜任进攻中场及左翼，近2季为禾夫斯堡上阵50次，入3球及5次助攻，但其中只有20场踢正选。

由於菲历斯尼美查只剩下1年合约，加上佢不满上阵时间不足，所以有意转会，禾夫斯堡仅将菲历斯尼美查标价为1,500万欧元(约1.28亿港元)，呢个价钱对於曼联而言，只系湿湿碎，唔担心买错「水货」。

不过，擅长发掘年轻球员嘅多蒙特亦有意加入争夺菲历斯尼美查，曼联未必执到平货。