周一(28日)凌晨英超上演戏剧性大战，利物浦作客喺落後1球兼踢少个劣势下，凭後备上阵嘅达云纽尼斯做救世主，最终喺补时「绝杀」反胜纽卡素2比1，领队高普赛後眉飞色舞，直指今仗系佢执教生涯代表作，难度更胜2019年欧联反胜巴塞隆拿嘅经典。

两队今场早段互有攻守，不过利物浦25分钟一次犯错就出事，阿历山大阿诺特接应穆罕默德沙拿回传「漏油」，被安东尼哥顿单刀射入；3分钟後「红军」再陷绝境，华基尔云迪积克连人带波踢跌单刀嘅阿历山大伊沙克，被球证直接出示红牌。

踢多个嘅纽卡素之後有唔少攻门，但门楣同门柱各救利物浦1命，顶得住嘅「红军」77分钟换入达云纽尼斯，呢位乌拉圭射手落场4分钟即入靓波追平，去到补时3分钟再接应穆罕默德沙拿直线，窄位抽射建功，带领利物浦奇迹反胜。

高普赛後兴奋表示：「喺我执教嘅1,000场比赛，从来冇经历过咁样嘅事，10人应战下喺呢种气氛面对呢个对手，我好肯定之後唔会再出现(反胜)，所以呢一刻系超级特别。今场比起当年反胜巴塞隆拿(首回合输0比3)更加困难，半场我同球员讲(如果反胜)，呢场会系你将来同儿孙讲嘅赛事，我10日後就会见我个孙，我会同佢讲！」

根据Opta数据，今场系利物浦喺英超史上第42次90分钟之後绝杀赢波，系所有英超球队当中最多嗰队，再次证明「红军」打不死嘅精神。利物浦开季3战2胜1和，下轮将会主场迎战阿士东维拉。