连续2场英超输波嘅纽卡素，球队队长拿修斯日前再卷入街头殴斗事件，佢上周日(20日)去夜店消遣後同人发生争执，并喺街上同6至8人发生打斗，拳来脚往兼且爆樽，有人甚至威胁会开枪，警方当时已介入调查。暴力影片近日曝光，纽卡素表示会内部处理。

事件发生喺上周日，纽卡素0比1输畀曼城後，球员获准放假2日，拿修斯同细佬以及1名朋友去夜店玩，离开嗰阵拿修斯细佬疑似被人「开肘」打中，纽卡素队长即刻出头将对方推开，迅即有6至8人加入战团，一班人拳来脚往，有人用伏特加酒樽飞掟拿修斯但打唔中，目击者指拿修斯细佬头部被打到流血，同行朋友更被踢头而晕倒，期间有人威吓：「我会开枪射你！」

英国《每日邮报》公开事发片段，拿修斯喺打斗入面系出於自衞，佢曾经按住一人叫对方冷静，但被另一人从後偷袭击中头部，拿修斯再出拳还击。据报喺警方到场前，对方所有人已经逃走，拿修斯个朋友曾昏迷15分钟被救护车送院。

29岁嘅拿修斯喺2014年加盟纽卡素，今季头3场联赛都做後备但未获派上阵，打斗影片曝光後《每日邮报》曾经联络纽卡素，球会表示会进行内部处理。