阿仙奴喺英超3比1击败曼联，不过胜负其实差之毫厘，其中关键一幕系88分钟仲系1比1嗰阵，曼联後备上阵嘅加拿祖单刀入波被判越位，转个头就被阿仙奴反胜。阿仙奴中坚加比尔马加希斯嘅「企鹅式」装越位成功，就获网民大赞。

当时曼联後场快速反击，卡斯米路直线传畀接应嘅加拿祖，电光火石之间，同加拿祖差唔多平排嘅加比尔马加希斯选择唔追，而系「企鹅式」煞车，将双手放身後尽量拉後身体，最终VAR画线果然显示加拿祖身体微微凸出，令入球被判无效。

前阿仙奴中坚马菲厄逊表示：「马加希斯嘅动作好似企喺悬崖边，行前一步就会跌死，如果佢系照常咁追，加拿祖肯定唔会越位。」唔少网民都大赞呢位巴西中坚：「呢一个动作系赢波关键」、「马加希斯IQ有1,000」、「洞察力同身体控制都一流」。