皇马正式宣布同前锋洛迪高高斯续约至2028年，毁约金提升至10亿欧元(约83亿港元)，加上早前已经续约嘅云尼斯奥斯祖利亚至2027年，意味「银河舰队」未来4至5年锋线将由呢2位「00後」巴西国脚担大旗。

现年22岁嘅洛迪高高斯4年前由巴西球队山度士加盟皇马，至今上阵179次，射入39球及33次助攻，本身踢翼锋出线嘅洛迪高高斯技术非常全面，亦可以胜任前锋，成功填补射手宾施马离队之後嘅位置，将影响减至最低，所以就算佢仲有2年半合约在身，皇马仍然决定同洛迪高高斯续长约。

皇马正处於新旧交接时期，除咗宾施马今夏离队之外，2位中场老将莫迪历、却奥斯亦可能明夏走人，会方积极同新一代主力倾续约，预料短期之内会同2位中场卡马云加、费达历高华维迪续约。