阿根廷门将达米安马天尼斯上星期喺金球奖拎「耶辛奖」，周日(5日)以世界最佳门将身份为阿士东维拉上阵，势估唔到拎完奖即出现严重失误，连累维拉作客0比2输畀诺定咸森林。

维拉今季表现神勇，不过今场就被森林嘅反击打爆，门将达米安马天尼斯亦失晒早晕，开波5分钟就被奥拉艾拿禁区外远射收死。维拉之後积极反扑，但换边後2分钟再输多球，奥利尔文加拿禁区外劲射，达米安马天尼斯飞扑「用错手」，结果个波弹高，落地後飘番入网，维拉士气大受打击，最终0比2输波。

维拉领队艾美利赛後力撑马天尼斯：「人类一定会犯错，我永远唔会惩罚犯错嘅人，咁样只会打击佢哋信心，我想佢哋充满信心咁继续练习同改善，唔系只系马天尼斯，我对全队所有人都一样。」