利物浦喺英超作客1比1逼和卢顿，路易斯迪亚斯以「救世主」姿态出现，不过乌拉圭前锋达云纽尼斯就惨成失分罪人，佢今场有平纪录嘅9次攻门，但最後惨食白果，而且仲有一次门前2码射高画面，令利物浦球迷又爱又恨。

达云纽尼斯今季表现明显进步，不过就系典型「神经刀」，愈易入嘅波就愈系入唔到，今场佢踢得非常积极，全场录得平今季英超纪录嘅9次埋门，单系上半场就有6次，其中1次射门中楣。愈踢愈急嘅达云纽尼斯下半场再有3次攻门，就喺卢顿开纪录前1分钟，佢接应穆罕默德沙拿头槌横传，门前2码抽到9楼高。

评述嘅利物浦名宿加历查表示：「纽尼斯今季踢得好，有好多值得欣赏嘅地方，但呢啲虾碌镜头就会成为话柄。我哋知道佢好有威胁，但把握力真系要提升，唔好再做笑话。」达云纽尼斯赛後喺IG留言：「我哋可以做得更多，多谢支持。」呢个帖亦禁制球迷留言，似乎佢都知道球迷唔会有好嘢讲。