周五(11日)凌晨英超上演「争4大战」，阿仙奴作客10人应战下以1比0险胜狼队，今场球证嘅执法再成焦点，阿仙奴前锋加比尔马天尼利喺下半场5秒内连续2次犯规，被球证「打孖」出示黄牌，2黄变1红直接被逐离场。

阿仙奴歇冬後首场比赛，上半场同狼队踢成均势，25分钟拿卡锡迪门前混战当中，快狼队门将一步将个波踢横，由中坚加比尔马加希斯门前射入。两队之後互有攻守，踢到69分钟出现争议性一幕，加比尔马天尼利先系用手阻碍对手快开界外球，但球证奥利华畀得益令比赛继续，5秒後加比尔马天尼利再喺禁区顶撞跌捷昆奴，结果奥利华吹停後出示「连环黄牌」，将呢位巴西小将赶走。

「兵工厂」10人应战下全军退守，面对狼队排山倒海进攻都力保不失，最终10人应战下保住1比0胜果。今场系阿仙奴今年第1场胜仗，赢波後有39分力压踢多场嘅曼联升上第5位，狼队输波後就以34分继续排喺第8位。

阿仙奴领队阿迪达赛後对红牌表示不满：「我喺英超18年来，第1次见到咁嘅情况，或者球例上系可以咁做，但球证真系要非常乐意出红牌意先至会发生。」有前球证表示，如果奥利华认为加比尔马天尼利第1下阻对手掟界外球系犯规，由於赛事处於死球状态，球证唔可以畀得益，比赛重开後奥利华就冇权再补罚黄牌。