利物浦捧走英联盃冠军，欢欣之中最遗憾嘅莫过於堤亚高艾简达拿，呢位西班牙中场原本正选上阵，点知喺开波前最後热身嗰阵受伤，正时位置临时改由拿比基达顶上，就连後备名单都要哈维艾利洛代替。决赛前飞来横祸，镜头影到堤亚高艾简达拿哭成泪人，要艾利臣比加喺旁边安慰。

30岁嘅堤亚高艾简达拿过去为巴塞隆拿同拜仁慕尼黑夺奖无数，自上季加盟利物浦後，今场系佢第1次为「红军」踢决赛，点知临开波先至受伤，难怪佢伤心爆喊。唔少球迷睇见呢个画面，都话戥堤亚高艾简达拿难过。

堤亚高艾简达拿近年伤患不断，今季就因伤缺席咗21场比赛，领队高普早前亦承认伤患大大影响佢嘅表现：「我哋都唔能够否认，堤亚高艾简达拿嘅伤患系一大问题，佢需要一段时间保持健康，先可以搵番比赛嘅节奏，经常伤下又踢下，对佢嘅表现有好大影响。」