新鲜出炉英联盃冠军利物浦，周四(3日)凌晨英足盃第5圈主场2比1击败诺域治，自领队高普上任後首度打入8强。日本国脚南野拓实今场包办利物浦2个入球，再度展现「盃赛专家」嘅实力，赛後获高普大力赞扬，而「红军」就继续向住4冠王目标进发。

利物浦今场起用大量後备，不过赢诺域治仍游刃有余，27分钟南野拓实接应奥历治妙传先开纪录，39分钟佢再藉诺域治解围不远，禁区内狂抽成2比0。利物浦之後放软手脚，诺域治喺76分钟追番1球，可惜为时已晚，利物浦顺利跻身8强，球队依家喺欧联、英超都有唔错形势，加上已到手嘅英联盃冠军，有机会成为4冠王。

南野拓实喺利物浦长居後备，但就打造出「盃赛杀手」角式，佢喺利物浦13个入波当中，9个都系嚟自英足盃或英联盃，另外1球就系社区盾，今季英足盃同英联盃加埋已入7球。高普赛後表示：「南野拓实2个入波当然最受注目，但佢今场仲有好多杰出贡献，佢嘅技术同精神一向都系顶尖，我对佢嘅表现唔觉得意外。」