现时被皇家马德伦外借至马略卡嘅日本新星久保建英，碍於皇马阵中人才济济，好难喺一队立足，据西班牙媒体报导，皇马已通知久保建英来季唔会获得加入一队嘅机会，令呢位东瀛兵嘅未来去向引起关注。

据报久保建英经理人同皇马代表，就久保建英嘅前途问题会面，皇马方面就表示呢位日本攻击手，唔喺主帅安察洛堤嘅计划当中。皇马阵中现时有多位非欧盟外援，包括云尼斯奥斯祖利亚、洛迪高高斯同艾达米列达奥，都系球队主力，同为非欧盟身分嘅久保建英，当然好难同佢哋争位。

现年20岁嘅久保建英，出身於巴塞青训，2019年加盟巴塞死对头皇马，一度引起轰动，但呢位日本国脚一直未能获得皇马重用，过去几季曾被外借至维拉利尔、基达菲同马略卡。据悉久保建英已决定喺下一个转会窗离队，转投另一支可以畀佢稳定出场机会嘅欧洲球队。