曼联周一(7日)凌晨喺「曼市打吡」惨败，王牌球星C朗拿度意外未有出现喺大军名单，虽然官方消息指C朗受伤缺阵，不过英国传媒爆料，指C朗喺赛前知道自己被贬後备，一怒之下报称受伤「罢踢」，更即时飞返家乡葡萄牙连波都唔睇，而呢个罢踢传闻，已获C朗家姐认证！

C朗今季一直系曼联必然正选，不过自兰历克上任後入球率大跌，前场逼抢踢法亦唔系C朗擅长嘅风格。英国《The Athletic》消息指，C朗得知自己喺「曼市打吡」冇正选後，报称自年初一直有问题嘅髋屈肌再受伤，并即刻飞返葡萄牙。虽然曼联并冇规定缺阵球员一定要喺比赛到场，但C朗喺呢场重要大战前离开英国，亦令一众队友同教练惊讶。

有趣嘅系，同C朗关系密切嘅葡萄牙网红，喺佢IG帐户cr7.0_lendario内爆料：「C朗冇受伤亦冇病，佢100%健康。我同你一样非常伤心同愤怒，因为兰历克摧毁我哋嘅星期日，佢决定以战术原因弃用C朗，希望加强防守。」呢个帐户有包括C朗在内嘅超过50万追随者，而呢段「爆料」更获C朗家姐Katia Aveiro畀Like认证！

兰历克赛後被问到C朗缺阵原因，呢位德国领队只简单表示：「军医星期五同我讲C朗有伤练唔到波，我要相信医疗部门，我都想佢今场可以候命。」不过曼联名宿坚尼就唔信呢个讲法：「大家成日都话C朗系机械人，绝少受伤，依家突然出现呢啲髋屈肌问题，我唔信罗！」