英国《太阳报》报道，曼联球星连格今年1月为球队作客比赛期间，豪宅被贼仔乘虚而入，损失总值10万镑嘅衣服同埋珠宝。消息指连格喺「爆格」事件发生後，即时将豪宅挂牌出售，或会加速佢离开曼联嘅行动。

据报曼联1月中作客阿士东维拉期间，连格喺曼市嘅屋被匪徒爆格，虽然10万镑损失对连格嚟讲唔系咩天文数目，但呢位英格兰国脚更加担心安全问题，尤其佢有一个年幼女儿，消息人士透露：「连格知道成为匪徒目标後好伤心，被偷嘅亦唔系无可取代嘅嘢，但作为一个父亲，佢忧心屋企嘅保安出现咩问题。」

就喺连格被爆格唔够1个星期後，队友域陀连迪加特亦喺对宾福特比赛期间被匪徒乘虚而入，而且当时域陀连迪加特嘅妻女都喺屋企，治安情况令曼联球员担心。报道指连格喺爆格事件後，已经将间豪宅放盘。