英超前4争逐激烈，热刺喺周二(8日)凌晨大发神威，主场以5比0狂数爱华顿，依家只系落後第4位嘅阿仙奴3分，领队干地赛後直指拎到前4名，等同赢欧联、英超冠军一样重要！热刺如果想达成愿望，王牌前锋哈利卡尼将系关键人物，佢今场梅开二度後，成功打破亨利嘅入球纪录，升上英超史上射手榜第6位。

热刺今场踢出气势，相反卷入降班漩涡嘅爱华顿不堪一击，14分钟赖恩施斯隆传中，爱华顿中坚米克坚尼误摆乌龙；热刺3分钟後由孙兴民拉开纪录，37分钟哈利卡尼单刀射成3比0。换边後爱华顿继续发梦，47分钟利古朗再入1球，哈利卡尼就喺55分钟「埋斋」，带领热刺大胜5比0完场。

哈利卡尼今仗梅开二度後，历来英超累积176球，超越阿仙奴传奇前锋亨利嘅175球，升上英超史上射手榜第6位(见表)，第5位就系热刺今仗对手爱华顿嘅领队林柏特，呢位英格兰国脚赛後表示：「亨利系我见过最出色嘅前锋之一，超越佢嘅入球系难以置信，我之後会继续争取入球。」

热刺依家虽然只排第7位，但距离阿仙奴只有3分，而且比赛场数少过前面嘅曼联同韦斯咸，争4形势更好，干地赛後表示：「我哋仲有12场决赛要踢，如果能够跻身前4名，对热刺嚟讲同赢欧联冠军、英超冠军冇分别。」

英超史上射手榜

1 舒利亚 260球 (441场)

2 朗尼 208球 (491场)

3 高尔 187球 (414场)

4 阿古路 184球 (275场)

5 林柏特 177球 (609场)

6 哈利卡尼 176球 (270场)

7 亨利 175球 (258场)